Eintóm gleði og hamingja

Gleðilegan þjóðhátíðardag! Eftir 2 daga er svo annar í þjóðhátíð, 19 júní, dagurinn sem konur 40 ára og eldri fengu kosningarétt... Þá ætlum við að mála bæinn bleikan. Of course Uppáhaldsauglýsingin mín er komin á youtube. Hún er hér: 

Á ferð og flugi

Hvað tekur langan tíma að ferðast frá Reykjavík til Helsinki? Ja, ef vélinni seinkar til landsins, bilar síðan og bilar síðan aftur þannig að þú missir af tengifluginu þá er svarið 16 tímar! Aðeins of langt fyrir minn smekk en því betra að komast á hótelið

Það ætti að vera aðvelt að giska á hvar ég er... og hvers vegna lítið heyrist í mér þessa dagana. Ég kem heim á morgun svo þetta er stutt stopp.

Keypti mér bókina "Það er staður í helvíti fyrir konur sem ekki styða hvor aðra" í fríhöfninni. Skemmtilegasta lesning. Hún er frekar beisik fyrir lengra komna en ég mæli sérstaklega með henni fyrir fólk sem vantar fljótlesna aðgengilega bók um helstu málefni. Bókina skrifa þær Lisa Marklund og Lotta - sem ég man ekki eftirnafnið á. Þær taka fjölmarg dæmi um eigin reynslu og flétta það saman við stöðuna, mýtur og rannsóknir - allt mjög aðgengilegt og á mannamáli eins og sagt er.

Það er oft skondið að skoða hvernig vel meðvitað jafnréttissinnað fólk getur dottið í kynjagryfjurnar. Í bókinni er tekið dæmi um að önnum kafið fólk geti hugsanlega fengið ræstingarkonu heim. KONU nota bene, ekki karl!

Ennþá saman

Grétar og ég erum ekki skilin. Sumum gætu þótt það fréttir.

Britney og Kevin saman á ný?

Eitthvað að gerast í auglýsingamálum

Fyrir nokkrum árum setti ég fram þá spá að til að hlutirnir gætu orðið betri þyrftu þeir að verða verri fyrst. Samhengið var augýsingar. Konur eru iðulega hlutgerðar og kynlífsgerðar í auglýsingum og margir eru orðnir svo vanir þessum auglýsingum að þeim dettur ekki í hug að mótmæla þó slíku efni sé dælt í okkar í tonnatali. Álíka myndir af körlum hafa verið sjaldséðnari þó þær hafi dúkkað upp kollinum af og til. Hins vegar hefur þeim fjölgað síðustu ár. Ég keypti t.d. karlablaðið FHM fyrir 2 árum til að nota í kennslu og þá brá mér nokkuð við að sjá hversu langt "þróunin" er komin varðandi karlmenn. Það er nefnilega ekki bara valdaójafnvægið og kynjamisréttið sem spilar rullu í hlutgervingu og kynlífsgervingu manneskjunnar í öllu mögulegu og ómögulegu samhengi heldur á markaðurinn stóran hlut líka. 

Undanfarið hafa 2 dæmi vakið athygli mína. Annars vegar auglýsingin sem sést hér til hliðar og hins vegar auglýsingar Símans um að við eigum nú öll að fara í sund. Á þeim bregður svo við að myndefnið er ungur karlmaður og eldri kona. Venjulega er þessu mótívi snúið við - eldri karl og ung kona virðist hafa verið ófrávíkjanleg regla - þar til nú (og væntanlega með örfáum undantekningum í viðbót). Ungi karlmaðurinn sem prýðir strætóskýlin er nokkuð vel hærður á bringunni - sem ég spái að heyri sögunni til eftir 10 - 15 ár. Þá held ég að enginn sem vill vera maður með mönnum geti látið sjá sig opinberlega með bringuhár, ekki frekar en konur geta látið sjá sig með loðna leggi...

Að mínu mati höfum við 2 valkosti. Við getum valið að berjast gegn hlutgervingunni eða við samþykkjum að bæði kyn verði hlutgerð, stöðluð og stíliseruð. Ég hef valið fyrri kostinn. Svo er bara spurning hversu margir velja hinn. Þeir sem ákveða að velja ekkert eða sitja hlutlausir hjá eru þó ekki hlutlausir í raun því þeirra atkvæði mun falla seinni valkostinum í vil.  

Víst kemur þetta íþróttunum við

Í fyrra var gerð tilraun til að fá FIFA og KSÍ til að berjast gegn vændi og mansali í tengslum við heimsmeistaramót karla í fótbolta sem fram fór í Þýskalandi. Þeirra svör voru að þeim kæmi þetta ekki við. Verður forvitnilegt að sjá hvernig íþróttahreyfingin bregst við þessu og hvort hún telji að barnaþrælkun í tengslum við stórviðburði sé yfirhöfuð á þeirra könnu. ÍSÍ bókaði andmæli út af vændi og mansali í Þýskalandi í fyrra þannig að ég hef nú allnokkuð meiri mætur á þeim en KSÍ.

Börn í þrældómi búa til vörur fyrir Ólympíuleikana

Vændi er ofbeldi

Fór á málþing KRFÍ á föstudaginn um vændi. Á málþinginu voru kynnt mismunandi sjónarhorn femínista á vændi. Þarna var hún Rosy, formaður alþjóðlegra samtaka kvennahreyfinga. Held það sé óhætt að kynna hana til sögunnar sem pro-prostitution. Henni finnst óþarfi að eyða orkunni í að berjast gegn vændi. Í staðinn finnst henni að við eigum að berjast fyrir aukinni fræðslu og getnaðarvörnum! Ætli það sé til þess að allar konurnar sem eru í vændi af fúsum og frjálsum vilja neyðist ekki til að fara reglulega í fóstureyðingar? Hvernig ætli það sé annars með karla sem kaupa vændi - ef vændiskonan verður ólétt og ákveður að eiga barnið - er þá ekki sjálfgefið að þeir borgi meðlag og séu með sameiginlegt forræði og forsjá?

Síðan var hún Rachael líka með erindi. Rachael er einstaklega vel máli farin og smart kona. Einhvern veginn heyrðist mér á máli hennar að hún væri líka pro-prostitution en það var víst misskilningur. Hins vegar varpaði hún nokkrum sprengjum - eins og til dæmis að það ætti að bera virðingu fyrir þeim sem selja konur og börn í mansal... og fyrir dólgunum... og fyrir kaupendunum. Einnig spurði hún hver væri munurinn á að selja líkama sinn í íþróttir eða veita nudd og á því að selja kynlíf þar sem typpi og píka koma við sögu? Mér finnst þetta næstum eins og brandarinn um muninn á milli kynlífs og legókubba sem var voða vinsæll fyrir tuttugu árum eða svo...  Rachael kom með nokkra góða punkta. Eins og t.d. að það þarf að spá í efnahagsaðstæður á svæðum þar sem vændi (og jafnvel mansal) er neyðarúrræði til að komast af. Þessir valkosti eiga hreinlega ekki að vera í boði.

Ágúst Ólafur var með ágætt erindi þar sem hann fordæmdi vændi og agiteraði fyrir sænsku leiðinni. Ég vona að hann og hans flokkur berjist fyrir því að sænska leiðin nái fram að ganga. Það vill nefnilega svo til að ekkert var um þetta mál í stjórnarsáttmálanum...

Marit frá Noregi fannst mér lang best. Sennilega af því að við erum sammála en líka vegna þess að hún kom með lang bestu rökin og hafði lag á að orða hlutina á sniðugan hátt. Hún benti á að ekki er hægt að greina á milli vændis og mansals - ef ekki væri vændi þá væri heldur ekki mansal - og hinn löglegi kynlífsiðnaðurinn er aðgangshliðið að ólöglega iðnaðinum, vændi og mansali. Hún véfengdi líka þá mýtu að karlar hafi einhverja óstjórnlega þörf fyrir kynlíf. Hver var það aftur sem benti á að enginn hefur drepist úr skorti af kynlífi hingað til? Hún sagði líka eitthvað á þessa leið "Ef karlar geta ekki haft stjórn á eigin kynhvöt, af hverju í ósköpunum fá þeir þá að stjórna landinu?" Góður punktur... og reyndar er ég nokkuð viss um að flestir karlar vilja ekkert láta skilgreina sig sem bremsulausa bíla í brekku... Hún svaraði líka Rachael varðandi virðinguna með því að segja að best væri að segja karlmönnum að hætta að kaupa vændi - það væri að bera virðingu fyrir þeim í raun.

Á málþinginu var tekist á um skilgreiningar á vændi. Einhver sagði að vændi væri að selja líkama. Önnur sagði að það væri að selja kynlíf. Mér finnst hvorug þessi skilgreining ná yfir hvað vændi er. Í mínum huga er skýrasta skilgreiningin að segja að vændi sé sala á nauðgun. Uppskar að mín er getið í leiðara Fréttablaðsins í dag fyrir vikið... Því miður erum við ekki komin svo langt að vera öll sammála um að vændi sé ofbeldi.

Fer ekki karlremban að deyja út?

Mikið er gaman þegar kerfið sem er búið til svo við getum öll búið í sátt og samlyndi án þess að niðurlægja hvert annað virkar! Mætti vera oftar svona. Langbest væri  að auglýsendur sendu aldrei frá sér svona auglýsingar. Zero herferðin hefði getað skipað sér á bekk með allraflottustu herferðum okkar tíma því hugsunun á bak við hana er snilld. En... í staðinn fyrir að búa til flotta og fyndna herferð var gerð illa íslenskuð og fordómafull herferð. Karlremban vill ólm setja sín fótspor á samtímann með óafmáanlegum hætti. Því miður. Tom Cruise hvað ég vona að karlremban deyji bráðum út! Úrskurður siðanefndar SÍA er allavega spor í rétta átt. Reyndar virðast Vífilfellskarlar og -konur hafa áttað sig eftir alla gagnrýnina sem herferðin fékk og snúið henni til betri vegar. Vona að þau bregðist nú ekki við úrskurðinum með því að hlaupa í vörn og segjast hafa gert allt rétt. Það er virðingarvert að játa á sig mistök.

Auglýsingaherferð fyrir Coke Zero í bága við siðareglur SÍA

Körlum mismunað!

Ég myndi nú segja að þetta væri argasta kynjamisrétti. Hvað með alla karlanna sem eru með litla rassa og engin tattú en dauðlangar til að afhenda verðlaunapening?

Engin húðflúr eða stóra rassa

Viltu búa til bíómynd?

Við erum alltaf að spá í baráttuleiðir og hvað ber helst árangur. Mín niðurstaða er sú að við þurfum að vera á öllum vígstöðum og nota margbreytilegar leiðir. Kynjakerfið er svo rótgróið í okkar samfélagi að því verður ekki breytt með því að pota í fáa staði... Eitt af því sem er spennandi að nota er listsköpun. Þess vegna finnst mér þetta námskeið sem Íslandsdeild WIFT stendur fyrir á morgun svo spennandi. Ég hlakka ógó mikið til þegar femínískar bíómyndir byrja að streyma á markað

Konurnar borga

Ekki þykir tiltökumál að hækka laun seðlabankastjóra um 200.000 kr  á mánuði á einu bretti. Hækkunin er hér um bil mánaðarlaun kennara... eða kannski 3ja vikna laun þeirra. Ástæðan fyrir hækkun hjá seðlabankastjórum er sögð vera vegna samkeppni við fjármálafyrirtæki og hárra launa þar. Ég held nú samt að ástæðan geti verið sú að Dabbi vilji gefa Ólafi langt nef með því að vera á hærri launum en hann!  

Spurningin er samt sem áður af hverju ekki er hægt að hækka laun hinna hefðbundnu kvennastétta sem vinna óendanlega mikilvægt starf í samfélaginu? Kennarar þurftu að fara í langt og strangt verkfall til að fá ca 3000 kr launahækkun! Það er ekki nóg með að konur vinni meirihlutann af þeim ólaunuðu störfum við heimilishald og uppeldi sem til falla á heimilum heldur bera þær auka skattbyrði á vinnumarkaði með því að vinna fyrir lægri laun en sem nemur verðmæti vinnuframlags... þar með lækkar skattbyrðin í samfélaginu - en það eru konurnar sem borga.

Flótti hlaupinn í kennarastéttina