Ertu nokkuð svona konu kona?

Sá í 10 fréttum RUV í gærkvöldi frétt um dóm í Þýskalandi þar sem konu var neitað um skilnað frá eiginmanni sínum á grundvelli þess að Kóraninn leyfði barsmíðar eiginmanna á eiginkonum. Þar sem þau voru bæði frá Marakkó þótti við hæfi að láta Kóraninn vera rétthærri en þýsk lög. Sem er reyndar áhugavert í ljósi þess að ég veit ekki til þess að Kóraninn sé svona ofbeldisfullur... Held þetta snúist frekar um túlkun eiginmanna á Kóraninum heldur en því sem þar stendur! 

En hvað um það. Dómarinn í þessu máli var kona. Ég held reyndar að hún hafi beðist afsökunar á dómnum og kennt álagi um þessa dómgreindarvillu. Í tilefni af dómnum finnst mér við hæfi að velta upp spurningunni um hvers vegna við viljum fleiri konur í áhrifastöður - og hvort það skiptir máli hvernig konur það eru. Er kona sama og kona?

Svona til að einfalda málið má segja að það séu 2 ástæður á bak við að fjölga konum í áhrifastöðum. Sú fyrri að ekki sé mismunað á konum á leið á toppinn frekar en annars staðar - þ.e. að konur eigi að hafa jöfn tækifæri og karlar til áhrifa. Hin ástæðan, sem mér finnst mun veigameiri, er sú að vonir eru bundnar við að konur sem komast í áhrifastöður muni beita sér í þágu jafnréttis, þ.e. beita sér í þá veru að útrýma kynjamisrétti. Til dæmis með því að passa upp á að launin séu þau sömu, veita konum sama framgang í starfi og körlum, hækka lægstu launin, innleiða fjölskyldustefnur og þar fram eftir götum. En þetta er auðvitað ekki sjálfgefið - síður en svo - og umræðan nú undanfarið hefur einmitt beinst að því hvernig konur það eru sem komast í gegnum glerþakið. Eru það konur sem afneita kvennabaráttunni og gerast undirgefnar við hin karllægu gildi? Eru það konur sem spá bara alls ekkert í þessi mál? Eða eru það konur sem eru með jafnréttishugsjónina á hreinu og vinna opinskátt í því að auka jafnrétti kynjanna?

Svarið er sennilega að þarna sé um einhvers konar blöndu að ræða... þær konur sem komast til áhrifa eru ekki allar eins. Hins vegar væri gaman að rannsaka þetta betur... Sérstaklega til að skoða hvort að gerð sé sú krafa á konur sem vilja komast til áhrifa að þær gerist varðhundar karlaveldisins - og taki þá "skyldu" í sumum tilfellum alvarlegar heldur en meðalkarlmaðurinn myndi gera!

ps. Fyrirsögnin er fengin að láni úr ræðu mikils metinnar konu í viðskiptalífinu sem er meðvituð um jafnréttismálin... Þetta er spurning sem hún fékk frá vel meinandi karlmanni sem var að gefa henni ráð um hvernig hún ætti að haga sér í viðskiptum... Hvað eru margir karlar sem hafa fengið þá spurningu hvort þeir séu nokkuð svona karla karlar? 

Ef allir dagar gætu verið eins og gærdagurinn!

Byrjaði daginn á því að halda námskeið um kynferðislega áreitni. Eftir hádegi kenndi ég upp í Listaháskóla - spjölluðum heilmikið um annars vegar um hið gagnkynhneigða norm í auglýsingum og hins vegar um klámvæðinguna og áhrif hennar. Endaði svo kvöldið í hópi hugsandi karlmanna þar sem ég skemmti þeim með sögum af bloggi, klámi og klámvæðingu! Það var skemmtilegt og þeir voru skemmtilegir.

Yndislegur dagur!  

Sportið... ætlar það að standa undir nafni sem fyrirmynd?

Mér barst eftirfarandi bréf í pósti:

Undanfarið hefur nokkuð verið að veltast í huga mér sem ég held að þurfi að fá að flögra um í fleiri kollum og þarfnist almennrar umræðu.

Þannig er að ég er félagi í íþróttafélagi, nánar tiltekið hestamannafélagi, á höfuðborgarsvæðinu. Reyndar er öll fjölskyldan í þessu félagi enda er hestamennskan frábært fjölskyldusport. Það sem að veldur áðurnefndum vangaveltum er sá siður sem haldinn er í heiðri í mínu félagi, og sjálfsagt fleirum, að á árlegum karlakvöldum félagsins er haft til skemmtunar að horfa á nektardans. Ekki var undantekning á þessari hefð í ár og voru konur keyptar til að skemmta körlunum með því að dansa erótískan dans og hátta sig um leið. Ég hef hugsað mikið um þennan dularfulla sið og skil hann alls ekki? Í hverju liggur skemmtunin? Er tilgangurinn kynörvun? Og þá fjölda karla saman???

Minn skilningur á tilgangi slíkrar skemmtunar er reyndar aukaatriði. Annað er það að eiginmanni mínum, sem þarna var, fannst nektarsýningin ekki mikil skemmtun frekar fannst honum hún óþægilegt áreiti og því er væntanlega eins farið með fjölda karlmanna sem þurfa að sitja undir slíkri niðurlægingu á ungum stúlkum.

Það sem er þó mjög athugavert er að slíkar “stripp” sýningar séu taldar sjálfsagðir viðburðir á skemmtunum sem haldnar eru á vegum íþróttafélags og í félagsheimili þess. Það félag sem hér um ræðir er að vinna að því að fá gæðastimpilinn “Fyrirmyndarfélag ÍSÍ” og því vil ég beina þeirri spurningu til ÍSÍ hvernig slíkar skemmtanir falla að jafnréttismarkmiðum ÍSÍ? Ég veit að Fyrirmyndarverkefnið snýr að barna- og unglingastarfi en þeir sem skipuleggja það starf þurfa þó væntanlega að sýna samkvæmni í störfum sínum og vera til fyrirmyndar, líka eftir klukkan átta á kvöldin. Svona uppákomur eru allavega afleit fyrirmynd fyrir börnin í félaginu og niðurlægjandi fyrir konurnar.

Ég veit að ég tala fyrir hönd margra kvenna og karla og óska eftir umræðu um þá staðreynd að slík kvenfyrirlitning þrífist á opinberum skemmtunum innan íþróttahreyfingarinnar. Ég óska líka eftir viðbrögðum frá Landsambandi hestamanna og ÍSÍ.

Mér finnst margt til umhugsunar í þessum efnum. Margir hrópa "frjálst val, frjálst val" í umræðunni um súlustaði, stripp, vændi, klám og allan þann pakka. En er raunverulega hægt að tala um frjálst val þegar svona er hluti af karlakvöldi? Er ekki greinilegt að einhver hluti karlmanna kærir sig hreinlega alls ekki um þetta en sitja uppi með ákvörðun þeirra sem vilja troða þessu upp á alla og gera þá kröfu að það sé merki um karlmennsku að hlutgera konur og kaupa líkama þeirra? Hvað með hjónabandssáttmála og traust á milli hjóna? Hvaða val eiga eiginkonurnar? Það virðist vera erfitt að koma því til skila að ef ekki er til staðar frelsi til að hafna - þá er ekki heldur frelsi til að velja... Vil að lokum taka það fram að mér finnst karlmenn sem standa upp og yfirgefa svæðið þegar svona "skemmtiatriði" eru í boði töff. Mér finnst karlar sem hreinlega mæta ekki á samkomur þar sem þetta er í boði töff. Mér finnst karlmenn sem sækja ekki súlustaði töff. Mér finnst karlar sem virða konur og líta á þær sem jafninga sína flottastir af öllum! 

Er annars bjartsýn á að ÍSÍ geri eitthvað í málinu... Bíð spennt eftir að sjá hvað það verður

Karlmenn óskast...

... í baráttuna gegn vændi!

Ættu konur ekki að borga minna?

Í ljósi þess að konur fá á heildina litið lægri laun fyrir sömu störf, hefðbundin kvennastörf eru metin minna en hefðbundin karlastörf og konur vinna meira af ólaunaðri vinnu á heimilinu á meðan karlinn vinnur launaða yfirvinnu á vinnumarkaði... ættu þá konur ekki að borga minna en ekki meira??? 

Bara spyr. Langar annars að gauka því að Gísla Tryggvasyni að skoða líka tryggingar hér á landi. Kyn hefur áhrif á verð líf- og sjúkdómatrygginga...  

ps. Aðgerðir annarrar bylgju kvennabaráttunnar fólu meðal annars í sér aðgerðir þar sem neitað var að borga fullt verð fyrir vöru eða þjónustu - eða jafnvel lögreglusektir!

Neytendum mismunað eftir kyni

Margbreytileikalýðræði...

Fyrirlesturinn hennar Öddu í hádeginu var frábær - enda er Adda snillingur svo það var ekki við öðru að búast Lýðræði er flókið fyrirbæri, svo mikið er víst, og í fyrirlestrinum fór Adda yfir ýmsar lýðræðispælingar frá sjónarhóli margbreytilegs samfélags. Hvernig getum við komið að þeim hugsunarhætti að í margbreytileikanum sé auðlind? Hér eru nokkrir hraðsoðnir punktar:

Forréttindahópur - getur látið sín sjónarmið hljóma eins og almannahagsmunir.

Barátta fyrir réttlæti - ætti að vera út frá félagslegri stöðu... það væri betra en út frá ákveðinni sjálfsmynd.

Mismunur = breytingarafl en ekki hindrun.

Hraðsoðnir punktar segja auðvitað ekki alla söguna - og ekki einu sinni hálfa söguna. Gætu meira að segja misskilist herfilega og sagt einhverja allt aðra sögu... Vonum þó að svo verði ekki en mikið afskaplega væri gaman ef við gætum aukið lýðræði í okkar lýðræðisþjóðfélagi!

***

Bendi svo á hið frábæra framtak Framtíðarlandsins: Grátt eða grænt - sáttmáli um framtíð Íslands. Hægt að skrifa undir á heimasíðu Framtíðarlandsins. 

Húsgögn og lýðræði

Ég mæli ekki með ferð í Ikea beint á eftir ferð í Saltfélagið! Jafnvel þó hið fyrrnefnda henti buddunni betur...! Við afrekuðum sem sagt ferð á báða staði á laugardaginn - og komumst að þeirri niðurstöðu að það væri fínt að geta keypt húsgögn í Saltfélaginu á Ikea verði. En það er víst ekki í boði. Annars fannst mér gamla Ikea búðin betri... of mikill kliður og læti í þessari búð. Sama stemning og í Kringlunni fyrir mig - hugsa mest um að komast út sem fyrst. Okkur tókst samt að kaupa nýjar sængur og kodda!

Svo er þetta í gangi í hádeginu:

Lýðræði hvað?

- ReykjavíkurAkademían

Í dag, mánudaginn 19. mars, er annar fundurinn í hádegisfundaröð ReykjavíkurAkademíunnar um lýðræði og samfélag. Erindi Arnþrúðar Ingólfsdóttur:  „Í krafti  margbreytileikans“. Á eftir verða pallborðsumræður um minnihlutahópa og lýðræði.

Í erindi  sínu leggur Arnþrúður út frá kenningum Iris Marion Young um lýðræði  sem snýst um að nýta félagslegan margbreytileika samfélagsins til að  auðga og styrkja lýðræðislega samræðu og ákvarðanatöku, svo lýðræði  geti náð til allra. En hluti af því er að gera fulltrúum  minnihlutahópa kleift að hafa meiri áhrif á lýðræðislegar  ákvarðanatökur.

Að erindi hennar loknu munu Anh-Dao Tran verkefnastjóri Framtíðar í  nýju landi, Sigursteinn R. Másson formaður Öryrkjabandalags Íslands,  Katrín Anna Guðmundsdóttir talskona Feministafélagsins og  Margrét  Margeirsdóttir, formaður félags eldri borgara  í Reykjavík taka þátt  í umræðu og svara spurningum úr sal.

Fundirnir hefjast stundvíslega kl: 12.15 og eru þeir haldnir í  húsnæði ReykjavíkurAkademíunnar Hringbraut 121 (JL-húsið), 4. hæð.

Að sjálfsögðu er öllum velkomið að mæta með hádegisbitann sinn, taka  þátt í hressandi umræðu og hita sig upp fyrir kosningar!

Fyrir konur sem hafa týnt kvenleikanum...

Ætlaði nú að vera búin að setja þetta inn mun fyrr í dag svo sem flestar konur gætu séð þetta fyrir matarboð helgarinnar. En betra er seint en aldrei og vonandi ná einhverjar konur að skoða þetta áður en þær verða sér til skammar í matarboðum! 

Jákvæða fréttin

Í Viðskiptablaðinu á miðvikudaginn var frétt um að fyrsti samkynhneigði karlmaðurinn sem kom út úr skápnum í NBA deildinni hefði fengið auglýsingasamning. Fyrrum leikmaðurinn, Jonh Amaechi, (hann lagði skóna á hilluna 2004) verður andlit HeadBlader rakvéla - sem eru vinsælar til höfuðraksturs. 

Það verður að teljast nokkuð stórt framfaraskref að hommi fái auglýsingasamning (en sorglegt á sama tíma að spá í hvað við erum komin skammt á veg..). Athyglisvert einnig að í fréttinni er sagt að eitt af því sem fæli íþróttamenn frá því að koma út úr skápnum sé hræðslan við að fá enga auglýsingasamninga - að þeir séu fráteknir fyrir hina gagnkynhneigðu íþróttamenn. Þetta er nú vonandi allt að breytast

Hvernig karlmaður ert þú?

Venjulega tek ég ekki að mér að hjálpa til við markaðssetningu... en stundum stenst ég ekki mátið!

Ert þú svona karlmaður sem vilt kynlíf án nándar? Svona RBB gaur sem þolir ekki kossa og knús? 

Ert þú svona karlmaður sem þolir ekki konur með skoðanir? Þessar sem halda kj eru miklu betri?

Ert þú svona karlmaður sem finnst að konur eigi ekki að hafa bílpróf? Það er svo miklu betra ef þú þarft að keyra konum út um allt?

Ert þú svona karlmaður sem ætlar að ala þínar dætur upp til að verða kynlífshjálpartæki fyrir karla -  fáklæddar í kynferðislegum stellingum með zero skoðanir?

Ef þetta ert þú... þá er Coka Cola Zero rétti drykkurinn fyrir þig!