Góðar fréttir

Frábærar fréttir og flott hjá KRFÍ að vekja athygli á þessu

Jöfn kynjahlutföll í stjórnum þriggja lífeyrissjóða

Konur vilja frelsi til að segja frá laununum sínum!

Um daginn spurði ég hvort það skiptir máli hvað við segjum - og fjallaði um mátt orðanna. Mig langar að halda aðeins áfram með þá umræðu. Í morgun var fyrirsögn á forsíðu Fréttablaðsins sem hljómaði svona: "Konur vilja banna launaleynd". Bann þykir afskaplega neikvætt orð á okkar tímum. Það þykir bera vott um skerðingu á frelsi eða forræðishyggju að banna eitthvað. Femínistar eru t.d. oft áskaðir um að vilja banna hitt og þetta - alls konar hluti sem femínistar vilja alls ekki banna - en þetta orð er tilvalið til að snúa út úr og skapa neikvæða ímynd. 

Þess vegna finnst mér athyglisvert þegar talað er um að banna launaleynd. "Bannið" snýst nefnilega um að afnema bann. Með öðrum orðum - konur vilja banna að það sé bannað að segja frá laununum sínum. Tveir mínusar gera plús - þetta lærðum við öll í skóla og það á við um þetta tilfelli. Það er verið að fara fram á aukið frelsi, frelsi til að mega segja frá. Það er verið að auka tjáningarfrelsi með því að aflétta banninu. Að tala um bann í því samhengi er eitthvað svo afstætt...

Ég er líka að velta því fyrir mér af hverju Sjálfstæðisflokkurinn og Frjálshyggjufélagið eru ekki fremst í flokki með að afnema launaleynd. Við erum oft að tala um frjálsan markað... en forsendur frjáls markaðar eru að fólk hafi upplýsingar fyrir hendi til að taka upplýstar ákvarðanir. Launaleynd er stýrður markaður þar sem upplýsingaleynd ríkir. Fólk sem vill í alvörunni skapa frjálsan markað ætti því að vera fylgjandi því að fólk sé frjálst til að segja frá laununum sínum.

En kjarni málsins er sem sagt - það að banna að eitthvað sé bannað - það er ekki bann! 

Karlatímarit

Tímarit um viðskipti og efnahagsmál var að detta inn um lúguna hjá mér. Tímaritið er gefið út af viðskipta- og hagfræðideild Háskóla Íslands og markmið þess er "að vera vettvangur fyrir fræðilega umræðu í viðskiptafræði og hagfræði". 

Í ár var ákveðið að vera með karlatímarit. Ritstjóri blaðsins er karlmaður. Tæknileg ritstjórn er reyndar í höndum konu og hún skemmir svolítið fyrir hinni allt-um-lykjandi karlastemningu. Í ritstjórn eru 3 karlar.  Í tímaritinu eru 4 greinar og þær eru allar eftir karla.

Kynjahlutföll í viðskipta- og hagfræðideild HÍ eru nokkuð jöfn. Það er til aragrúi kvenna með viðskiptafræðimenntun í samfélaginu. Get ekki sagt að ég fagni því neitt sérstaklega að fá bara rödd karla inn um lúguna hjá mér.... ég vil fá raddir bæði karla og kvenna.  

Vilt þú afnema launamisrétti?

Hér er kjörið tækifæri til að gera eitthvað í málinu. Ég má til með að koma því að að karlar eru afar sjaldséðir á svona samkomum. Hér er fínt tækifæri til að bæta þar úr!

***

Launamisrétti kynjanna – úr sögunni árið 2070 eða hvað?

Ellefu kvennasamtök efna til morgunverðarfundar með stjórnmálaflokkunum þriðjudaginn 17. apríl kl. 8.00-9.30 á Grand hótel Reykjavík. Til umræðu verður launamisrétti kynjanna og aðgerðir til að útrýma því. Erindi flytja Lilja Mósesdóttir hagfræðingur og Þórey Laufey Diðriksdóttir formaður Kennarafélags Reykjavíkur. Á eftir sitja fulltrúar stjórnmálaflokkanna fyrir svörum. Fundarstjóri Tatjana Latinovic.

Fyrir tæpum tveimur árum söfnuðust tugþúsundir kvenna saman í miðborg Reykjavíkur til að minnast þess að 30 ár voru liðin frá kvennafrídeginum 24. okt. 1975 og til að krefjast launajafnréttis kynjanna. Í kjölfar kvennaársins 1975 var gerð könnun á launamun kynjanna sem leiddi í ljós að konur í þéttbýli höfðu að meðaltali 45% af launum karla. Nú rúmum 30 árum síðar hafa konur að meðaltali um 62% af launum karla þrátt fyrir að hafa bætt við sig mikilli menntun og vinna sífellt lengri vinnudag. Með sama áframhaldi verður launabilinu útrýmt upp úr 2070. Þolinmæði okkar er á þrotum, við ætlum ekki að bíða svo lengi.

Meðallaun segja ekki alla söguna en þau spegla þá staðreynd að staða kvenna er önnur en staða karla. Íslenskur vinnumarkaður er mjög kynskiptur og lítur út fyrir að svo verði áfram ef marka má nýja könnun á framtíðarstarfsvali 15  ára unglinga. Sú staðreynd blasir við að störf sem konur vinna í mun ríkara mæli en karlar eru láglaunastörf. Stór hópur kvenna vinnur afar mikilvæg störf, t.d. við kennslu barna, en þau eru illa launuð þrátt fyrir mikla ábyrgð og kröfur um sífellt meiri menntun. Hluti kvenna vinnu hlutastörf til að geta sinnt börnum sínum. Hvers vegna bera þær meiri ábyrgð á umönnun barna en feðurnir? Svarið felst að miklu leyti í launamun kynjanna. Hluti kvenna er heimavinnandi, af hverju ekki pabbarnir? Svarið er það sama.

Rannsóknir hafa margsýnt fram á að hér á landi er verulegur launamunur milli kynjanna, konum í óhag, sem eingöngu verður skýrður með kynferði.
Samkvæmt könnun Capacent frá árinu 2006 var kynbundinn launamunur 15,7%.
Hver ríkisstjórnin á fætur annarri hefur heitið því að útrýma launamun kynjanna en hvar eru efndirnar? Það hvorki gengur né rekur. Við svo búið má ekki standa. Íslenskar kvennahreyfingar spyrja því stjórnmálaflokkana nú í aðdraganda alþingiskosninga til hvaða aðgerða þeir ætla að grípa til að útrýma launamisréttinu og stöðva þar með þau mannréttindabrot sem konur sæta á íslenskum vinnumarkaði.

Bríet - félag ungra femínista
Femínistafélag Íslands
Kvenfélagasamband Íslands
Kvennaathvarfið
Kvennaráðgjöfin
Kvenréttindafélag Íslands
Rannsóknastofa í kvenna og kynjafræðum
Samtök kvenna af erlendum uppruna
Stígamót
V-dagssamtökin
UNIFEM á Íslandi

Enn um kynjakvóta

Ég er loksins búin að komast í því í hvaða kjördæmi ég er Síðast var ég í Reykjavík norður, þrátt fyrir að hafa búið hér um bil á sama stað og núna - í húsinu við hliðina á, en núna er ég í Reykjavík suður. Ástæðan er sú að búið er að skipta Grafarholtinu í tvennt og við þann gjörning fluttist ég í nýtt kjördæmi. Það segir sig auðvitað sjálft að hagsmunir mínir sem þjóðfélagsþegn eru gjörólíkir eftir því hvar ég bý í Grafarholtinu! Ég tala nú ekki um ef að ég myndi búa í Mosó eða jafnvel í Grafarvoginum! 

Kvótakerfi byggt á póstnúmerum þykir við hæfi í dag en kynjakvóti ekki. Ekki að ég sé brjálæðsilega fylgjandi kynjakvótum sjálf - þætti mun betra ef við værum jafnréttissamfélag og hlutirnir væru í lagi. En svo er ekki... og þess vegna hlýtur að vera þess virði að ræða kynjakvóta. Ég spái því nú reyndar að eftir því sem konum fjölgar á þingi þá verði karlar hlynntari kynjakvótum.... svona til að tryggja að þeir verði aldrei í minnihluta á þingi . 

Kynjakvótinn hefur kosti og galla. Hann neyðir flokkanna til að hleypa hæfu konunum sínum að... og að ekki sé hægt að kjósa eftir kyni. Þannig stuðlar kynjakvótinn að auknu lýðræði og kynin búa við aukið jafnræði. Kynjakvóti læknar hins vegar ekki rót vandans - en það er spurning hvort hann sé nauðsynlegur plástur þar til rótin hefur jafnað sig og er komin í lag?

Stærsti ókosturinn við lögbundinn kynjakvóta hlýtur hins vegar að vera sá að hann kemur í veg fyrir nýtt kvennaframboð!!!

Yes!

8 konur og 3 karlar kjörin í miðstjórn Sjálfstæðisflokksins um helgina. Þetta hlýtur að teljast saga til næsta bæjar og full ástæða til að óska Sjálfstæðisfólki til hamingju með þetta. Gott hlutfall kvenna í miðstjórn vegur upp á móti skorti kvenna í valdastöðum á vegum flokksins. 

Í borgarstjórn sitja 4 karlar og 3 konur sem borgarfulltrúar á vegum flokksins. Á alþingi eru 23 þingmenn Sjálfstæðisflokksins, 16 karlar og 7 konur. Ráðherrar eru 6, þar af einungis 1 kona. Útlit fyrir komandi alþingiskosningar er ekki gott varðandi kynjahlutföll flokksins. 5 karlar og 1 kona leiða lista flokksins og úrslit prófkjara voru ekkert til að hrópa húrra fyrir þegar jafnrétti kynjanna er haft til hliðsjónar. Flokksmenn virðast þó sjá að þetta er eitthvað til að skammast sín fyrir og hafa vaknað aðeins á landsþingu og reynt að bæta úr - sem er frábært, enda hafa skoðanakannanir sýnt að flokkurinn nýtur mun meira fylgis meðal karla en kvenna. 

Óska Sjálfstæðisflokknum til hamingju með þetta. Vona að flokkurinn bíði ekki skaða af öllum þessa kvennafans í miðstjórninni og fari vonandi bráðum að jafna kynjahlutföllum á öðrum vígstöðum. 

Kjartan fékk flest atkvæði í miðstjórnarkjöri

Skin og skúrir

Fyrst sería #4 af 24 var ekki til á vídeóleigunni varð Little Miss Sunshine fyrir valinu. Scary movie, svo það sé orðað mildilega. Augljóslega er ég ekki fylgjandi fullorðins konusýningum en ég myndi samt ekki vilja banna þær. Ég held samt að ég væri alveg fylgjandi banni á fegurðarsýningum barna. Ég hef aldrei skoðað þetta fyrirbæri, vissi bara að litlu stelpurnar eru "grossly overdone" með meik-upi, hárgreiðslu og pífukjólum. Ef eitthvað er að marka myndina er þetta enn verra en ég bjóst við. Fölsk augnahár, brúnkumeðferð, hártoppar og sundfataatriði með pínkulitlum stelpum.

En þetta er ágætismynd. Ádeilan sett upp sem gamanmynd með nóg af drama... Uppáhaldssetningin mín úr myndinni er "Í skottinu á bílnum okkar" 

Auglýst eftir 24

Vill svo vel til að einhver sem ég þekki eigi fjórðu seríuna af 24 og langar ógeðslega mikið til að lána mér hana?

Alltaf bjartsýn!

Femínískur dagur!

Ok. Ég byrjaði kannski ekki daginn á því að gera það sem ég átti að gera. Ég fór að leita í gömlum Morgunblöðum að atvinnuauglýsingum (sjá fyrri færslu) en það er óhætt að segja að þetta hafi verið með skemmtilegri dögum. Í hádeginu fór ég á fyrirlestur Karen Ross um fjölmiðla og stjórmálakonur. Karen hefur stúderað þetta málefni frá árinu 1994 - eftir að hún var sjálf í pólitík og fann mikinn mun á hvernig fjölmiðlar fjölluðu um hana vs karlkyns kollega hennar. Rannsóknir Karenar byggja á fjölmiðlakönnunum í kringum kosningar, viðtölum við stjórnmálakonur og einstaka viðtölum við fjölmiðlakonur. Hún hefur stundað rannsóknir í nokkrum löndum - Bretlandi, Írlandi, Suður-Afríku... og nú í sumar eru hún að fara til Nýja Sjálands. Alls staðar er mynstrið samt eins, konur og karlar eru meðhöndluð á mismunandi hátt í fjölmiðlum.

Erindi hennar var nefnt "hvar fékk hún þessa skó?" og er einmitt lýsandi fyrir útlitsáhuga fjölmiðla á stjórnmálakonum. Það var nokkuð skondið að sjá að það var ljósmyndari staddur á staðnum sem gerði sér far um að mynda skó kvenna, þ.m.t. Siv Friðleyfsdóttur og Bryndísar Schram, að fyrirlestri loknum. Áhugavert í ljósi umræðuefnisins...

Eftir fyrirlesturinn bauð ég mér í kaffi til Gyðu Margrétar femínista og við náðum að ræða vítt og breytt um femínisma... auk þess sem Gyða bauð upp á kaffi og ristað brauð! Algjört æði og ég ætla að muna eftir að bjóða mér oftar til hennar í kaffi! Þaðan lá leiðin beint á landsfund Samfylkingarinnar. Þetta er í fyrsta sinn sem ég hef verið viðstödd landsfund stjórnmálaflokks - og í fyrsta sinn sem ég kom inn í Egilshöll... Ég gekk inn í salinn og beint inn í hóp jakkafataklæddra karlmanna. Ég hugsaði með mér að svona gæti þetta ekki verið... hvar voru konurnar? Ég komst framhjá körlunum og inn í salinn og þar blasti við öllu blandaðari hópur. Sjúkkit! Komst að því seinna að hópurinn sem ég gekk inn í fyrst voru Karlakórinn Fóstbræður! Hlaut að vera lógísk útskýring á þessu. Anyways, það var Beta vinkona sem sagði við mig að ég mætti ekki missa af þessu. Mona Sahlin (formaður sænskra jafnaðarmanna) og Helle Thorning-Smith (formaður danskra jafnaðarmanna) voru gestir á landsþinginu.  Djöfull voru þær kröftugar! Það var æðislegt að sjá konurnar 3 sem eru formenn norrænu jafnaðarmannaflokkanna ganga saman inn í salinn og enn skemmtilegra var auðvitað að hlusta á hvað þær höfðu að segja! Ekki síður var gaman að hlusta á Dag B. Eggertsson túlka ræðu Monu Sahlin. Sérstaklega af því hann byrjaði á að þurfa að segja hvað hann hefði nú gaman að því að vera ein þriggja kvenna sem leiddi jafnaðarmannaflokk...

Anyways... þegar ég hætti sem talskona þarf ég greinilega líka að hætta að vera þverpólitísk og velja mér flokk til að starfa í. Greinilega nauðsynlegt að taka þátt í pólitíkinni og gengur víst ekki að vilja vera í öllum flokkum til lengdar...

Náði að rétt skjótast heim eftir fundinn og brunaði svo niður á Við Tjörnina (ok... Grétar keyrði mig) þar sem ég snæddi ljúffengan kvöldverð með Karen Ross, Kristínu Ástgeirs, Lilju Hjartar og Önnu Kristínu. Í einu orði sagt - frábært! Við Grétar skutluðumst svo á Boston til að hitta Betu... 

Svo sannarlega frábær dagur! 

„Það þarf konu til að koma jafnaðarmannastjórn að völdum"

Háseta vantar á bát

Morgunblaðið 9. nóv 1913

Ráðskona,

annaðhvort roskinn kvenmaður eða ekkja, óskast á stórt húsmóðurslaust heimili. Hún þarf að vera röggsöm, þrifin og dugleg, og treysta sér til þess að annast 4 ára gamla telpu, með móðurlegri umhyggju.

Hátt kaup. Umsóknir hafa enga þýðingu, nema viðkomandi sé gædd þessum nauðsynlegu eiginleikum.

Skriflegar umsóknir merktar "Húsmóðir" sendist afgreiðslu Morgunblaðsins innan 4. daga.

***

Morgunblaðið, 3. janúar 1960

Skrifstofumaður

Verzlunarfyrirtæki hér í bænum óskar eftir að ráða ungan reglusaman mann, sem getur tekið að sér öll algengt skrifstofustörf ásamt bókhaldi. Hér er um að ræða vel launað framtíðarstarf.

Tilboð óskast sent afgr. Mbl. fyrir 10. jan. n.k. Merkt "Skrifstofumaður - 4363".

***

Morgunblaðið, 4. janúar 1972

Stúlka óskast í vist að Laugarvatni til 15. maí.

*

Barngóð og áreiðanleg kona, helzt við Vesturberg Breiðholti, óskast til að gæta 10 mánaða stúlku á morgnana.

*

Starfsstúlkur óskast nú þegar hálfan daginn, aðallega á sjúkradeild.

*

Starfsstúlkur óskast í veitingahús.

*

Múrverk. Vantar 4-6 múrarar. Gott verk. Mikil vinna.

*

Hafnarfjörður. Karlmaður óskast til verksmiðjustarfa. Upplýsingar ekki gefnar í síma. Sælgætisgerðin Móna.

*

Bakara vantar við brauðgerðarhús í nágreinni Reykjavíkur.

*

Starfsmaður óskast. Íþróttabandalag Reykjavíkur óskar að ráða duglegan mann til að starfrækja skíðalyftur við Skíðaskálann í Hveradölum svo og til umsjónar og eftirlits með skólanum.

*

Stúlka óskast strax til starfa í veitingahúsi hér í borg. Engin kvöldvinna og frí um helgar.

*

Vanur mælingamaður óskast til starfa sem fyrst.

*

Morgunblaðið 18. janúar 1976

Laghentur maður. Óskum að ráða nú þegar í starf við ýmisskonar smíði og viðhald á vélum og tækjum í verskmiðju vorri. Þarf að vera laghentur maður á járn og helzt einnig tré. Um framtíðarstarf er að ræða.

*

Starfsstúlka óskast til ræstinga.

*

Óskum eftir að ráða stúlku til starfa við launaútreikning og bókhald.

*

Stúlka eða kona óskast til skrifstofustarfa um næstu mánaðarmót. Þarf að hafa æfingu í vélritun og notkun reiknivéla. Sæmilega launað starf.

*

Óskum eftir að ráða vanan jarðýtustjóra nú þegar.  

*

Stýrimann, vélstjóra og háseta vantar á m/b SjólaRE 18 sem fer á þorskanetaveiðar.