Hvernig rækta á býflugur

Ég fjárfesti nýlega í bókinni The Rough Guide to Ethical Shopping. Hún er stútfull af alls kyns fróðleik um „siðferðileg kaup“ á vörum eins og mat, fötum, fjárfestingum, heimilisvörum og ferðalögum. Það kom mér á óvart að sjá að bókin er gefin út árið 2004 og í framhaldi af því velti ég fyrir mér hvort við Íslendingar séum ekki ansi aftarlega á merinni hvað varðar viðskiptasiðferði í samhengi við umhverfið, hvort sem litið er á það frá neytendahliðinni eða að sjá ónýtt viðskiptatækifæri á markaði sem á væntanlega bara eftir að stækka.

5 aðferðir
Fjallað er um 5 aðferðir við siðferðileg kaup. Fyrstu tvær eru að kaupa Fairtrade vörur eða hreinlega að sniðganga ákveðnar vörur (boycott). Hins vegar er ómögulegt að versla allt þannig og því er stungið upp á að velja ábyrgasta aðilann sem er í boði af stóru aðilunum. Heimurinn á mest undir því að stóru aðilarnir, þar sem veltan er mest, taki upp betri viðskiptahætti og því getur verið áhrifaríkt að setja meiri pressu á þá. Síðast en ekki síst er stungið upp á því að fólk hreinlega dragi úr innkaupum og kaupi minna og einnig að kaupa vörur sem eru ræktaðar eða framleiddar á heimaslóðum til að spara flutningskostnað langar leiðir.

Skór fyrir grænmetisætur
Eitt sem hefur stoppað marga í að spá í hvaða vörumerki er best að kaupa er skortur á upplýsingum. Þetta virðist vera óendanlegur frumskógur og fólk hefur hreinlega ekki tíma til að berjast í gegnum hann. Þess vegna tel ég mig einstaklega heppna að hafa dottið niður á bókina því einhver annar er búinn að vinna vinnuna og ég get auðveldlega flett upp hvaða fyrirtæki eru á plús listanum og hver eru á svarta listanum. Internetið er líka gagnlegt hjálpartæki. Ég skoðaði nokkrar vefsíður sem bent er á í bókinni. Á www.fishonline.org er hægt að skoða ástand fiskitegunda og hvort er mælt með þeim eða ekki. Íslenski þorskurinn kemur sem betur fer ágætlega út. Vefsíður eins og www.corporatewatch.org.uk  eru gagnlegar til að skoða stórfyrirtæki og sögu þeirra. Á www.onevillage.co.uk er hægt að fjárfesta í dásamlegu hengirúmi og fleiri vörum framleiddum af handverksfólki frá sumum fátækustu ríkjum heimsins. Ef þig vantar far þá geturðu athugað www.freewheelers.com sem gengur út á að draga úr bílanotkum með því að tengja saman bílstjóra og farþega. Ef þú ert til dæmis að fara frá Amsterdam til Prag þann 8. júlí á næsta ári geturðu fengið far með Jesper. Á www.vegetarian-shoes.co.uk er hægt að finna skó sem ekki eru gerðir úr leðri eða öðrum dýraafurðum.

Nei takk, ekki býflugnabú í garðinn minn
Tímaritið The New Consumer, sem fjallar aðallega um Fairtrade heldur einnig úti spennandi vefsíðu. Ég get vel hugsað mér að gerast áskrifandi að blaðinu og reyna að fylgjast betur með hvernig ég get orðið meðvitaður neytandi. Ég set hins vegar fótinn niður þegar kemur að nýjasta æðinu sem kynnt er á forsíðu vefsins www.newconsumer.com. Þar er að finna leiðbeiningar fyrir borgarbúa um hvernig setja á upp býflugnabú út í garði svo hægt sé að framleiða eigið hunang. Þó ég voni heitt og innilega að við getum tekið okkur á og breytt lífsháttum svo jörðin verði byggileg fyrir komandi kynslóðir þá vona ég líka að nágrannar mínir sleppi býflugnaræktinni.

**

Þessi pistill birtist í Viðskiptablaðinu þann 1. ágúst 2007. 

Athugasemdir

[fifa (IP-tala skráð) 8.9.2007 kl. 09:25]

thetta er lika til her heima, thad er ad vera samferda folki ut a land og ut um allt land. http://samferda.net/

ast og bylting (samt helst ekki islomsk)

[Margrét (IP-tala skráð) 8.9.2007 kl. 22:40]

Ég las þennan pistil í viðskiptablaðinu á sínum tíma og hann rímar skemmtilega við bakþannka Guðmundar Steingrímssonar á fréttablaðinu í dag. Við erum algjörir aular þegar kemur að því að vera vakandi sem neytendur. Ég get samt ekki annað en verið algjörlega ósammála þér með býflugurnar. Það fer ekkert fyrir þeim, þær eru ekki árásargjarnar (eins og geitungar þegar búin leysast upp) og það væri virkilega gaman að geta keypt staðbundið hunang með bragðkeim af þeim plöntum sem vaxa hér á landi, ég tala nú ekki um að geta gætt sér á sínu eigin. ég læt samt berjarækt duga í augnablikinu en þori að fullyrða að þú myndir ekki einu sinni verða var við það þótt nágrannar þínir væru með býflugur.