Megrunarlausi dagurinn 2007

Megrunarlausi dagurinn 2007

Megrunarlausi dagurinn (International No Diet Day) er alþjóðlegur baráttudagur gegn megrun, átröskunum og fordómum í garð feitra.  Árið 1992 stofnaði Mary Evans Young, fyrrum sjálfsveltisjúklingur, International No Diet Day til þess að vekja athygli á skaðlegum áhrifum útlitsdýrkunar og mismununar í garð þeirra sem falla utan hins viðurkennda ramma um æskilegan líkamsvöxt. Síðan þá hefur skipulögð dagskrá verið haldin víða um heim árlega þann 6. maí til þess að vekja athygli á þjáningum sem hljótast af þráhyggju um grannan vöxt og almennri andúð á fitu. Á Íslandi verður gefið út blaðið Líkamsvirðing sem verður dreift um allt land með Fréttablaðinu sunnudaginn 6. maí.

Á þessum degi eru allir hvattir til þess að láta af viðleitni sinni til þess að grennast, þó ekki væri nema í einn dag, og leyfa sér að upplifa fegurð og fjölbreytileika mismunandi líkamsvaxtar og sjá fyrir sér veröld þar sem megrun er ekki til, þar sem hvers kyns líkamsvöxtur getur verið tákn um hreysti og fegurð og mismunun vegna holdarfars þekkist ekki.

Á þessum degi viljum við:
o    fagna margbreytilegum líkamsvexti af öllum stærðum og gerðum
o    minna á rétt ALLRA til heilbrigðis, hamingju og velferðar óháð líkamsvexti   
o    lýsa yfir opinberum frídegi frá hugsunum um mat, megrun og líkamsvöxt
o    vekja athygli á lítt þekktum staðreyndum um megrun, heilsu og holdafar
o    minna á hvernig megrun og stöðug krafa um grannan vöxt er samfélagsleg atlaga gegn konum
o    minnast fórnarlamba átraskana og hættulegra megrunaraðferða
o    berjast gegn andúð á líkamsfitu og fordómum vegna vaxtarlags.

Athugasemdir

[Þrándur (IP-tala skráð) 5.5.2007 kl. 02:16]

Málstaðurinn er svosem ágætur, en staðreyndin er hinsvegar sú að ofát er margfalt meira vandamál en vannæring í hinum vestræna heim.  Því er allt tal um að fólk almennt láti af viðleitni sinni til að grennast, hreinlega til þess að auka á vandan frekar en hitt.  Fáránlegt fjas fólks sem hefur ekki hugmynd um hvað það er að tala. Offita er eitt alvarlegasta heilbrigðisvandamálið á vesturlöndum.  Rétt svar er hófleg næring og góð hreyfing, ekki ofurást á fitukeppum og hreyfingarleysi.

Það er líka staðreynd að offituvandamálið fer vaxand, en ekki öfugt.  Þetta gerist þrátt fyrir að feministar séu sannfærðir um að vesturlandabúar í heild sinni séu helteknir einhverju megrunaræði og séu við það að svelta sig í hel.

[Anna Ólafsdóttir (anno) (IP-tala skráð) 5.5.2007 kl. 03:00]

Alveg frábært framtak hjá þessari konu að stofna þennan dag. Verð að viðurkenna að ég hef aldrei heyrt um þetta fyrr. Takk fyrir þennan fróðlega pistil