Gott að vera í forystu

Hjartað í mér tók kipp þegar ég las í Fréttablaðinu í morgun að búið væri að jafna verðlaunafé kvenna og karla á Wimbletonleikunum. Ekki að þetta hafi verið nýjar fréttir - það eru nokkrir dagar síðan þetta birtist fyrst í fréttum. Gleðin stafaði af því að ég hugsaði um þegar verðlaunaféð var jafnað í Landsbankadeild kvenna og karla hérna heima. Það er gaman að vera í forystu í jafnréttismálum. Það er eitthvað sem gerir mig stolta af því að vera Íslendingur... 

Við höfum sama tækifærið upp á borðum núna varðandi klámið - getum tekið forystu í baráttunni gegn kláminu. Það er undravert að nást skyldi þverpólitísk samstaða um málið, bæði í borgarstjórn og á alþingi. Ég held að pólitíkusar séu kannski að átta sig á alvöru málsins og að þetta sé lykilatriði í baráttunni gegn vændi, mansali og kynferðisofbeldi.

En það er skrýtið að fylgjast með fjölmiðlum. Nokkrir hafa barið sér á brjóst og lýst því yfir að yfirgnæfandi meirihluti þjóðarinnar hafi viljað fá klámhópinn til landsins í kjölfar þess að Fréttablaðið birti niðurstöður úr könnun sinni. Það er hins vegar rangt að yfirgnæfandi meirihluti þjóðarinnar hafi viljað fá hópinn til landsins. Á meðal kvenna var skiptingin nokkuð jöfn. Rétt tæpur meirihluti sammála ákvörðun Hótel Sögu og rétt rúmlega helmingur kvenna á móti. Hjá körlum var skiptingin hins vegar þannig að þar er hægt að tala um yfirgnæfandi meirihluta - mig minnir að þar hafi skiptingin verið ca 70/30. Segir sitt um mismunandi afstöðu kynjanna...

Heildarniðurstaðan úr könnuninni, óháð kyni, var að 61% voru á móti ákvörðun Hótel Sögu. Þetta er kallaður yfirgnæfandi meirihluti af sumum. Ég vona að þeir hinir sömu muni það næst þegar talið berst að kynjaskiptingu í þrískiptu valdi lýðræðisins - þar sem karlar eru með yfirgnæfandi meirihluta - og sumir stefna á 60/40 skiptingu sem "sanngjarna" skiptingu...

En annars gaman að sjá að stjórnmálamenn eru að taka á þeirri vá sem stafar af klámiðnaðinum - án þess að vera með popúlismann efst á blaði... það er slæmt að fylgja fordæmi klámhundanna í hvort gripið skuli vera til aðgerða eða ekki. Það er einfaldega of mikið í húfi. 

Má svo til að bæta því við að ég er sannfærð um að niðurstöður könnunar Fréttablaðsins hefði orðið allt öðruvísi ef fólk hefði vitað hvers konar efni var að finna á heimasíðum væntanlegra þátttakenda. Fjölmiðlar mega gjarnan taka til umhugsunar hvort þeir hafi komið því til skila...  

Athugasemdir

[Greta Björg Úlfsdóttir, 28.2.2007 kl. 14:21]

Ég sá ekki þessa könnun frétta blaðsins, en grunar Eyja hitti naglann á höfuðið varðandi þær spurngingar sem lagðar voru fram.

Varðandi þessa klámþingsumræðu alla, þá finnst sorglegt hversu margir sem hrópuðu hæst um brot á mannréttindum virðast ekki gera sér ljóst að löglegt klám er mjög oft, ef ekki alltaf, fjármagnað af alþjóðlegum glæpahringjum, sem sækjast eftir að skýla sér á bak við slíka löglega starfsemi. Í skjóli hennar þrífst svo annað og verra, og mannréttingabrot eru framin daglega sem taka langt fram því sem þeir vilja álíta það hafa verið að segja klámhópnum upp gistingunni. 

[Katrín Anna Guðmundsdóttir, 28.2.2007 kl. 17:49]

Ég held reynar að þetta hafi verið símakönnun en ekki netkönnun. Það var í það minnsta hægt að tengja niðurstöðurnar við kyn og stjórnmálaflokk... En já, það er mikil vanþekking - eða vísvitandi blinda, myndi ég segja, á áhrif klámiðnaðarins.

[FLÓTTAMAÐURINN, 28.2.2007 kl. 22:05]

"Varðandi þessa klámþingsumræðu alla, þá finnst sorglegt hversu margir sem hrópuðu hæst um brot á mannréttindum virðast ekki gera sér ljóst að löglegt klám er mjög oft, ef ekki alltaf, fjármagnað af alþjóðlegum glæpahringjum, sem sækjast eftir að skýla sér á bak við slíka löglega starfsemi."

...............