Tekjur ekki nauðsynlegar

Sem betur fer eru þeir dagar liðnir þegar fólk þurfti að fara bónleið til bankastjórans, útlista nákvæmlega hvað þeim vantaði pening í og vera svo upp á náð og miskunn bankastjórans komin varðandi lán. Því miður eru hins vegar þeir dagar komnir að við erum komin akkúrat á hinn enda öfgana. Ég frétti um helgina að einn bankinn sendir bréf til þeirra sem verða 18 ára. Hamingjuóskir eru auðvitað við hæfi þegar fólk stígur sín fyrstu skref inn í fullorðinsárin. Hins vegar fylgir með hamingjuóskinni tilboð um 40.000 kr yfirdrátt á engum vöxtum í 3 mánuði. Þvílíkur happafengur fyrir fólk daginn sem það verður fjárráða - sérstaklega fólkið sem er í skóla, ekki með neinar tekjur heldur býr heima hjá foreldrum og er á framfærslu þeirra. Bankinn gerir nefnilega engar kröfur um tekjur... 

Athugasemdir

[Davíð Halldór Lúðvíksson (IP-tala skráð) 27.2.2007 kl. 14:53]

Þökk sé fyrir því að markaðsfyrirtækin hafa áttað sig á því að konur stjórna sameiginlegum ráðstöfunartekjum (80% hlutfalslega) í samvistum/samböndum fólks og þannig eru markaðsfyrirtækjum ráðlagt að herja á kvennfólk auglýsingaáróðri sínum :)

[Katrín Anna Guðmundsdóttir, 27.2.2007 kl. 15:12]

Já þvílík gleði. Var akkúrat að skrifa pistil um þetta... en kannski ekki alveg á sömu nótunum! Annars eru börn líka skilgreind núna sem ansi áhrifaríkt afl á ráðstöfunartekjur - ráða víst oft hvaða tegund af bíl er keypt.

[Davíð Halldór Lúðvíksson (IP-tala skráð) 27.2.2007 kl. 15:22]

Það er samt ólöglegt að höfða til barna í auglýsingum hérna á Íslandi.

[Katrín Anna Guðmundsdóttir, 27.2.2007 kl. 15:29]

Já en þau verða sífellt eftirsóknarverðari markhópur. Er einmitt búin að vera með bókina Born to buy lengi á náttborðinu mínu. Næ kannski að lesa hana í sumar Mæli annars með bókinni Branded fyrir áhugasama. Þar er aðferðarfræðin tíunduð - og sumt af því er very scary - eins og rúmlega þrítugar konur sem eru í vinnu við að vingast við vinsælar unglingsstúlkur, þykjast hafa áhuga á öllu sem þær gera (sækja m.a. skólaleikrit og þess háttar sem stúlkurnar leika í). Gefa þeim síðan alls kyns fatnað, fylgihluti eða annað frá fyrirtækinu þeirra í þeirri von að vinir stelpnanna kaupi síðan líka og svo koll af kolli. Pumpa þær líka um upplýsingar um kauphegðun, áhugamál og alls konar um vini þeirra. Margir áhugaverðir vinklar í þessu... eins og með bankanna sem lánar 18 ára sem eru á framfærslu foreldra 40.000 án vitneskju eða samþykkis þeirra sem borga brúsann. Veit ekki hvort þeim voru boðin sérkjör á yfirdráttarvöxtum eftir að 3 mán. runnu út en skv heimasíðu þeirra eru vextir fyrir námsmenn 18,5% en 23,5% annars. Þetta er ansi "sniðugt" til að fá fólk til að vera húkked á bankanum sínum...

[Davíð Halldór Lúðvíksson (IP-tala skráð) 27.2.2007 kl. 16:01]

Þegar menn rýna vel í markaðstengdan áróður er hálf óhungnarlegt hversu hnitmiðaður hann er. Það er hvergi sparað í þeim efnum enda kostaður af milljónum fyrirtækja útum allan heim.