Tunglið er úr osti

Ég vona að einhver taki saman lista yfir öll þau gullkorn sem fallið hafa af vörum ráðamanna síðustu mánuðina. Hér er eitt skondið. Björgvin segir sem sagt að þeim hafi tekist að forða þjóðargjaldþroti. Hann er líka bjartsýnn á framhaldið. Hið rétta er að ráðamönnum þjóðarinnar tókst ekki að forða okkur frá þjóðargjaldþroti. Þeim tókst akkúrat hitt - að koma okkur á hausinn með dyggri aðstoð útrásarvíkinganna. Jújú, tæknilega séð erum við ekki gjaldþrota. Tæknilega. Skuldsetningin er hins vegar slík að auðvitað erum við gjaldþrota. Við fáum bara brjálæðislega mikið af lánum sem kemur í hlut komandi kynslóða að borga ásamt því sem við munum sjá stórfelldan niðurskurð í heilbrigðis-, mennta- og velferðakerfum okkar. Ráðamenn ættu því að spara að slá sér á brjóst fyrir þann hetjuskap að hafa forðað okkur frá þjóðargjaldþroti. Það er álíka satt og að tunglið sé úr osti.

Þetta er besti kosturinn

Vona að valdhafar fari að átta sig á að nú vantar okkur fólk sem er ekki í sérhagsmunagæslu - nýtt fólk með þekkingu. Neyðarstjórn kvenna er auðvitað löngu búin að stinga upp á besta kostinum. Held hlutaðeigandi aðilar hafi bara ekki séð þetta þegar ég setti þetta fyrst inn:

Neyðarstjórn kvenna skorar á forseta, ríkisstjórn og Alþingi Íslendinga að skipa utanþingsstjórn yfir landinu hið fyrsta. Ráðamenn þjóðarinnar verða að axla ábyrgð á því efnahagslega hruni sem hér hefur orðið með því að setja stjórn ríkisins í hendurnar á færustu sérfræðingum sem völ er á fram að kosningum. Nauðsynlegt er að tryggja þrískiptingu valdsins og utanþingsstjórn sem skipuð er fagfólki og sérfræðingum sem ekki sitja á þingi er kjörin leið til þess. Til að tryggja lýðræðislegt fyrirkomulag er jafnframt nauðsynlegt að utanþingsstjórn sé skipuð jafnmörgum konum og körlum.

Sjálftöku hinna ríku verður að linna

Sjálftöku hinna ríku verður að linna. Það er gjörsamlega óverjandi að gera starfslokasamning við mann sem hefur brugðist í sínu starfi upp á heilt ár. Skv frétt á visir.is er Jónas með 1,7 milljónir í laun á mánuði sem þýðir að hann fær 20,4 milljónir fyrir að gera ekki neitt.

Nú þegar kreppan skellur á og „allir eiga að leggja sitt af mörkum“, eins og tíðrætt er um, þá verður að hafa réttlætis- og sanngirnissjónarmið efst á blaði. Það er engin sanngirni í því að flest þeirra sem missa vinna eru með þriggja mánaða uppsagnarfrest en síðan eru sérsamningar fyrir hina ríku og útvöldu. Þetta er almannafé og það er hægt að gera heilan helling fyrir þennan pening - t.d. að halda geðdeild FSA opinni.  Niðurskurðurinn þar var upp á 17,5 m - lægri upphæð en Jónas fær fyrir að sitja og bora í nefið.  

Jónas hættir 1. mars

Björgvin sniðugur!?

Get ekki annað en dáðst að þessu pólitíska útspili Björgvins G. Sigurðssonar - segir af sér korteri áður en átti að reka hann!!! Nú getur hann sagst hafa axlað sína pólitísku ábyrgð og á mun betri möguleika í komandi prófkjöri fyrir vikið.

Ef Björgvin hefði gert nákvæmlega þetta fyrir 3 mánuðum - já eða 2 - þá hefði þetta verið alvöru. Þá hefði líka verið komið nýtt fólk í fjármálaeftirlitið sem hefði getað látið til sín taka. Fyrrverandi forstjóri og stjórn eru auðvitað búin að sýna og sanna hversu ómögulegir þeir eru í að taka á málum. Vonandi stendur nýtt fólk sig betur. 

Þó mér finnist þessi afsögn koma fullseint þá tók ég nú samt gleðikipp við tíðindin. Þetta er til marks um að mótmælin eru að skila sínu. Nú er búið að boða til kosninga, einn ráðherra hefur sagt af sér og forstjóri og stjórn FME víkja. Loksins erum við að sjá að það er ekki hægt að koma heilu þjóðfélagi á hausinn án þess að einhver axli ábyrgð. Baráttan er samt ekki búin enn. Það er margt eftir og mun fleiri eiga eftir að viðurkenna og axla sína ábyrgð.

Að lokum er hér áskorun frá Neyðarstjórn kvenna sem send var út í gær:

Neyðarstjórn kvenna skorar á forseta, ríkisstjórn og Alþingi Íslendinga að skipa utanþingsstjórn yfir landinu hið fyrsta. Ráðamenn þjóðarinnar verða að axla ábyrgð á því efnahagslega hruni sem hér hefur orðið með því að setja stjórn ríkisins í hendurnar á færustu sérfræðingum sem völ er á fram að kosningum. Nauðsynlegt er að tryggja þrískiptingu valdsins og utanþingsstjórn sem skipuð er fagfólki og sérfræðingum sem ekki sitja á þingi er kjörin leið til þess. Til að tryggja lýðræðislegt fyrirkomulag er jafnframt nauðsynlegt að utanþingsstjórn sé skipuð jafnmörgum konum og körlum.

Um Neyðarstjórn kvenna
Neyðarstjórn kvenna er stofnuð vegna þeirrar kreppu sem þjóðin stendur nú frammi fyrir. Neyðarstjórnin hefur það markmið að stuðla að uppbyggingu þjóðfélagsins þar sem í heiðri eru höfð viðhorf og gildi sem fela í sér virðingu fyrir manneskjunni, samfélaginu, lífinu, náttúrunni og umhverfinu. Nú þegar hafa nokkur hundruð konur komið að starfi Neyðarstjórnarinnar og á þriðja þúsund konur eru skráðar í nethóp félagsins.

 

Björgvin segir af sér

Nýtt kvennaframboð?

Mig langar aðeins til að forvitnast um hvaða hug fólk ber til nýs kvennaframboðs. Við Íslendingar eigum langa sögu um slíkt. Árið 1908 var kvennalisti í bæjarstjórnarkosningum hér í Reykjavík. Bríet Bjarnhéðinsdóttir var þar á lista ásamt þrem öðrum kvenskörungum; Guðrúnu Björnsdóttur, Katrínu Magnússon og Þórunni Jónassen*. Þær hlutu glimrandi góða kosningu og hefðu komið fimmtu konunni að í bæjarstjórn ef hún bara hefði verið á lista! Árið 1922 var Ingibjörg H. Bjarnason kosin á alþingi fyrst kvenna. Það var einnig fyrir tilstilli kvennalista. Árið 1982 voru síðan tvö kvennaframboð - í sveitarstjórnarkosningum á Akureyri og í Reykjavík. Síðan er það auðvitað Kvennalistinn sjálfur sem bauð fram í alþingiskosningum 1983. Það ár fjölgaði konum á þingi úr 5% í 15%.

Þar sem nú gengur mikið á í íslenskum stjórnmálum og ljóst er að jafnrétti er hér í mörgu ábótavant, okkur öllum til skaða þá vaknar upp sú spurning hvort nú sé kominn tími á nýtt kvennaframboð. Hvað segið þið?

Setti inn nýja spurningakönnun hér hægra megin en svo er líka fínt að tjá sig í athugasemdakerfinu.

 

* Sjá nánar á heimasíðu Kvennasögusafns 

Karlaveldið Ísland

Nú hefur Hagstofan gefið út skýrslu sem staðfestir enn og aftur hversu slæm staða hér er í jafnréttismálum. Málin hafa sem sagt ekkert þokast áfram síðustu tvo áratugi eða svo. Þetta eru reyndar ekki nýjar fréttir fyrir þau okkar sem erum á kafi í þessari baráttu en engu að síður er bráðnauðsynlegt að fá þessa staðfestingu í opinberri skýrslu, sem og að fá heildaryfirlit yfir stöðuna.

Ég vona að nú á þessum síðustu og verstu tímum staldri fólk sem að öllu jöfnu hefur talið stöðuna ágæta aðeins við og setji jafnréttismálin í samhengi við þá lýðræðisumræðu sem nú er hafin. Margir hafa talað um að hér ríki ekki lýðræði í reynd heldur flokksræði. Önnur útgáfa á þessu er að skoða þetta út frá kynjasjónarhóli og segja að hér ríki ekki heldur eingöngu flokksræði heldur búum við í karlaveldi. Með öðrum orðum, við búum í samfélagi þar sem karlar hafa enn tögl og haldir og það sést svart á hvítu á tölfræðinni. Í þeirri lýðræðisumræðu sem nú er í gangi er þjóðfélaginu lífsnauðsynlegt að skoða lýðræði í orðsins fyllstu merkingu og hvað það þýðir. Það gengur ekki í samfélagi sem kynin byggja til jafns að karlar séu alls staðar í meirihlutastöðum valds. Það þýðir ekki einungis að karlar ráði heldur einnig að karllæg hugmyndafræði (heimurinn skilgreindur út frá sjónarhóli karlmannsins) verður ríkjandi hugmyndafræði. Ef við tökum þetta aðeins út frá hefðbundnum kynhlutverkum þá er t.d. borðleggjandi að tengja græðgisvæðingu síðustu áratuga beint við fyrirvinnuhlutverkið - eitt helsta og áhrifamesta karlmennskuhlutverkið. Kyn skipti gríðarlega miklu máli þegar kemur að vonum og væntingum í lífinu - og hvaða hlutverk okkur er ætlað að uppfylla. Kynið og ríkjandi hugmyndir um kynhlutverk verður því að taka til gagngerrar endurskoðunar ef okkur á nokkurn tímann að takast að nálgast einhverjar lýðræðishugmyndir. Sömu sögu má segja um ýmsa aðra hópa. Lýðræðið er lítið í reynd ef það er þaulskipulagt í kringum einn eða tvo ríkjandi hópa. Byggja þarf upp sanngjarnt og réttlátt samfélag fyrir alla sem hér eru - fólk af erlendum uppruna, samkynhneigða, aldraða, öryrkja, börn, karla, konur o.s.frv. 

Sem stendur er allt of margt miðað við of fáa og út frá valdatengslum - völdum og yfirráðum, stéttskiptingu og óréttlæti. Það þarf að breyta mun fleiru en bara flokksræðinu eigi framtíðin að líta nokkurn veginn út eins og við viljum. 

* 

Hér er Hagstofuskýrslan - fyrir þau sem vilja skoða. 

 

Mun fleiri karlar en konur í áhrifastöðum

Til stuðnings Geirs???

Í fyrri færslu minni gagnrýndi ég frétt mbl.is fyrir að þar kæmi ekki fram hver er að baki mótmælunum gegn mótmælendum á sunnudaginn. Fyrst fjölmiðlar ætla ekki að standa sig í stykkinu við að upplýsa almenning þá skal ég taka það að mér í bili ;) Svo virðist sem aðalsprautan að baki mótmælum gegn mótmælendum sé maður að nafni Andrés Pétur. Hann stofnaði grúppu á facebook sem ber nafnið „Fordæmum mótmælendur sem beita ofbeldi og ógnandi aðferðum ". Sami Andrés Pétur stofnaði líka aðra grúppu á facebook. Sú nefnist „Stuðningsmenn Geirs H Haarde “.

Hér virðist því vera um meðvitaða tilraun að ræða til að etja mótmælendum saman - kljúfa samstöðuna. Sunnudagsmótmælin mætti því túlka út frá orðum Þorgerðar Katrínar sem sagði að mótmæli mættu ekki snúast upp í andhverfu sína - og Fréttablaðið velti fyrir sér hvort mótmæli sem gerðu það væri þá ekki meðmæli! Sem má alveg túlka sunnudagsmótmælin fyrir að vera. Friðsamir mótmælendur ættu einmitt að velta vel og vel vandlega fyrir sér hvort slíkt sé ekki einmitt tilraun til að etja tveim hópum saman - og draga þannig athygli frá málstaðnum en eykur aftur á móti líkurnar á óeirðum.

Friðsömum mótmælendum bendi ég á annan skýran og góðan valkost - appelsínugulan. Hér er heimasíða þeirra. Hér er málið einfalt. Vertu í appelsínugulu þegar þú mætir á mótmæli og segðu þannig að þú sért friðsamur mótmælandi. Ofbeldi er aldrei valkostur. Hef reyndar ekki hugmynd um hver er á bak við appelsínugulan - en hér er þó um friðarboðskap að ræða... en ekki að stefna fólki á fund.

Bendi hér líka á flotta grein í tímaritinu Nei, „Að lifa eins og skepna."

 

 

 

Þreföld kreppa

Össur segir að við búum við tvöfalda kreppu - gjaldeyris- og bankakreppu. Hann gleymir þeirri þriðju. Við erum líka í lýðræðiskreppu.

Tek undir með honum að mótmælendur hafa sýnt mikla stillingu fram að þess - en jafnframt er furðulegt að sjá í næstu setningu að þrjú erlend fyrirtæki hafi sýnt áhuga á að fjármagna virkjanir hér á landi. Ég er ekki að mótmæla til þess að virkja meira eða taka meira af háaum erlendum lánum. Það er komið nóg af þeirri vitleysu. Tími græðgi á að vera liðinn og okkar kynslóð er búin með sinn virkjanakvóta. Komandi kynslóðir verða að eiga eitthvað eftir til að taka ákvarðanir um.  

Erlend fyrirtæki sýna áhuga á virkjunum

3. í byltingu

Í dag ku vera 3. í byltingu. Ég vona að mótmælin í dag verði jafn fjölmenn og í gær. Hins vegar þurfa að vera skýrar reglur um mótmælaaðferðir. Við þurfum byltingu. Það er alveg ljóst - en sú bylting þarf líka að vera án ofbeldis. Það er alveg hægt. Hvort sem valdstjórnin fer fram með of miklu offorsi og beitir táragasi að tilefnislausu þá réttlætir það ekki ofbeldi á móti. „Hún reitti hann til reiði“ er ekki boðleg afsökun hér frekar en annars staðar.

Ef löggan beitir aftur táragasi er sniðugast að mæta aftur til leiks og stilla sér upp fyrir framan hana. Án ofbeldis. Við verðum nefnilega líka að muna ALLTAF fyrir hverju við erum að berjast. Við erum að berjast fyrir réttlátara Íslandi. Við viljum ekki þá spillingu, siðblindu, græðgi, valdníðslu, efnahagslega ofbeldi og landráð sem hér hafa viðgengist. Við viljum Ísland án ofbeldis. Það þýðir líka að við þurfum að vera uppfinningasöm þegar kemur að mótmælaaðgerðum og borgaralegri óhlýðni. Ofbeldi er aldrei lausnin á vandanum. Ofbeldi leiðir af sér stríð og styrjaldir. Það er ekki það sem við berjumst fyrir - sama hversu mikilli valdníðslu stjórnvöld ákveða að beita. Við erum öll að berjast fyrir betra Íslandi og við þurfum að sjá til þess að útkoman verði betri en ekki verri. 

Ég fór á mótmælin í gær og í fyrradag. Það er æðsilegt að standa með fjöldanum, hlusta á dúndrandi trommusláttinn og kalla „vanhæf ríkisstjórn“ og finna samstöðuna. Þetta virkar. Veit að yfirgnæfandi meirihluti mótmælenda vill mótmæli án ofbeldis. Hinir verða að taka sig saman í andlitinu. Öll verðum við að passa upp á að láta þetta ekki draga úr okkur kjarkinn, baráttuandann eða kraftinn í mótmælunum.

Fyrir mér er þetta líka hluti af jafnréttisbaráttunni. Konur og börn á Íslandi búa við mikið ofbeldi og stór hluti af jafnréttisbaráttunni er gegn kynbundnu ofbeldi. Að glíma við vandamál með ofbeldi er hluti af karlmennskuímynd - kynhlutverki sem haldið er að litlum strákum jafnt sem fullorðnum karlmönnum. Það er nóg að skoða eins og einn leikfangabækling til að sjá ofbeldistenginuna. Öskudagsbæklingar eru sérstaklega gott sýnidæmi. Þar eru strákarnir í búningum  sjóræningja, tortímanda, hermanna og ýmiskonar „súpermanna“. Stelpurnar eru hins vegar í pastellituðum prinsessukjólum. Hvorug ímyndin er holl ofbeldislausu jafnréttissamfélagi. Í mótmælunum skulum við því hvorugt hlutverkið leika - hvorki vera ofbeldisfullir tortímendur né undirgefnar prinsessur.

Til eru ýmsar uppskriftir að mótmælum og borgaralegri óhlýðni. Hér hafa t.d. verið haldin námskeið í borgaralegri óhlýðni. Ég hef ekki borið gæfu til að sækja þessi námskeið en hef heyrt ýmsa punkta. Eins og t.d. að streitast ekki á móti við handtökur. Ef löggan vill handtaka einhvern þá er það bara allt í lagi. Ef löggan reynir að æsa mótmælendur upp til að rjúfa samstöðuna þá er það allt í lagi - en látum henni ekki takast það - hvort sem einstaka óeirðaseggir bregðast við með ofbeldi eða ekki. Við höldum bara okkar striki.

Skilyrðislaus stuðningur er eitt af þeim vandamálum sem við glímum við. Kannski að hluta til vegna þess að það þykir merki ósamstöðu þegar fólk tekst á um aðferðir. Það á ekki að vera svoleiðis. Hér sést þetta vel á flokkunum - þingmenn kjósa eftir flokki, eftir því í hvaða liði þeir eru, en ekki eftir eigin sannfæringu. Sem betur fer er þetta aðeins að breytast eins og sjá má á Samfylkingarfundinum í gær. Við sem erum mótmælendur skulum líka ganga á undan með góðu fordæmi og ræða baráttuaðferðir - fordæma ofbeldið og hvetja til ofbeldislausra en háværra mótmæla. Löggan kannski hefur það í huga líka - að hlýða ekki valdstjórninni þegar hún fær fyrirmæli um að beita mótmælendur óþarfa hörku. Löggan samanstendur ekki af maurum sem ber skilyrðislaust að framfylgja valdníðslu yfirboðara sinna. Mannkynssagan hefur kennt okkur að þjóðir eru verr settar eftir á þegar sú er raunin. Þó dómsmálaráðherra vilji her er ekki þar með sagt að löggan eigi að taka að sér það hlutverk að vera hermenn. Hér er ekki stríð - hér er bylting.

**

Viðbót: shit - held ég hafi tengt þetta við vitlausa frétt... gleymdi að setja inn efni um fréttina. Það þarf að koma fram í fréttinni hverjir standa á bakvið mótmælin á sunnudaginn. Það þýðir ekkert að boða til einhverra nafnlausra mótmæla. Auk þess finnst mér hálf skrýtið að boða til mótmæla gegn mótmælendum. Eru þessi mótmæli þá til stuðnings ríkisstjórninni? Eða hvað er málið? Fólki væri nær að mæta bara í almenn mótmæli. Þau eru ofbeldislaus að lang mestu leyti og það er einmitt hugur langflestra mótmæla. Að halda að það sé hægt að búa til ný mótmæli og að þau verði ekki eins er naive að mínu mati - býður upp á tvær fylkingar og eykur hættuna á átökum þeirra á milli. Trúi ekki að reyndir mótmælendur standi á bakvið mótmælin á sunnudaginn.

Mótmæli gegn ofbeldi og eignaspjöllum

„Áfram ríkisstjórn“

Var niður á Austurvelli áðan þegar skyndilega lækkaði í trommuslættinum og einhver kallaði „GJALLARHORN, GJALLARHORN“ af lífs og sálar kröftum. Þegar gjallarhornið mætti á svæðið var tilkynnt af jafnmiklum krafti að Geir Haarde hefði lýst því yfir að ekkert gæfi tilefni til kosninga í vor! Ég fór að spá í af hverju hann er svona veruleikafirrtur og allt í einu rann það upp fyrir mér. Þegar maður er staddur örlítið frá mótmælunum heyrist orðið vanhæf ekkert sérstaklega vel. Geir situr því örugglega groddaralegur inn á þingi, ánægður með okkur. Viss um að hann hringir í erlendu pressuna og segir þeim að allt sé í fína á Íslandi - fyrir utan þingið standi þjóðin og öskri eins og hún eigi lífið að leysa „ÁFRAM RÍKISSTJÓRN!“