Veröld sem ég vil

Langar að senda síðbúnar afmæliskveðjur til KRFÍ. Félagið varð 100 ára á laugardaginn. Ég kom ekki heim fyrr en á sunnudag svo ég missti af afmælisveislunni. 

KRFÍ hefur verið öflugt í kvennabaráttunni frá því árið 1907. Fyrir einhverjum árum var gefin út bókin Veröld sem ég vil. Þar er að finna sögu félagsins frá upphafi. Þetta er fróðleg og skemmtileg bók sem ég mæli eindregið með, enda KRFÍ stór hluti af sögu okkar Íslendinga. Titillinn á bókinni er líka í sérstöku uppáhaldi. Veröld sem ég vil - hljómar fallega og passar svo vel inn í baráttu femínista fyrir samfélagi sem við viljum.

KRFÍ á miklar þakkir skildar fyrir jafnréttisbaráttu á Íslandi og víðar til að stuðla að veröld sem við viljum.

Athugasemdir

[Eygló S. Halldórsdóttir (IP-tala skráð) 31.1.2007 kl. 09:58]

Langar til gamans að bæta svolitlu við þessa afmælisósk til KRFÍ. Föðuramma mín Guðbjörg Alexandersdóttir, sem var í vist 1905-1909 hjá

Sigurði Jónssyni yfirkennara, seinna skólastjóra Miðbæjarskólans og frú Önnu Magnúsdóttur kennara frá Öndverðanesi í Grímsnesi.

 segir svo frá í æviminningum sínum:

Frúin kenndi þrjá tíma á dag, svo var hún í Kvenréttindafélaginu og starfaði þar þó nokkuð. Þær unnu saman hún og Bríet Bjarnhéðisdóttir, sem kom oft heim til okkar. Meðan þær drukku kaffið, skröfuðu þær mest um Guðrúnu konu Þorsteins Erlingssonar, hún var skrautblómið í félagsskapnum. Svo liðu tímar uns kom að því að Bríet átti merkisafmæli. Þá var Svana, litla dóttir Þorsteins og Guðrúnar send með fallega blómakörfu og kort sem áskrifuð afmælisósk fylgdi:

Heill sé þér Bríet besta frú,

þú blómstur meðal landsins kvenna;

sem betur ferð með blek og penna

en blaðamanna fjöldinn nú.

Sit heil í þínu heiðurssæti

í höllilnni við Þingholtsstræti

og lát þitt kæra kvennablað

nú kvaka í landsins höfuðstað.

Annars mátti heita gott samkomulag í Kvenréttindafélaginu, dálítill æsingur á útifundum og þá sérstaklega í barnaskólaportinu. Ég held að næstum hver kona hafi fylgt manni sínum í kosningunum. Svo voru vinnukonurnar ákaflega húsbóndahollar og yfirleitt duglegar að "agintera". Fengu líka drjúgan skilding og þó nokkra frídaga út á það.

Með kveðju og afmælisósk,

Eygló .S. Halldórsdóttir

[Katrín Anna Guðmundsdóttir, 31.1.2007 kl. 11:08]

Takk fyrir þetta